विश्वकप क्रिकेट २०१९ को भारतीय टोलीमा विकेटकिपर, ब्याट्सम्यान रिषभ पन्त परेका छैनन् । तर इन्डियन प्रिमियर लिग (आइपीएल) को बुधबार राति सनराइजर्स हैदरावादविरुद्ध भएको खेलमा दिल्ली क्यापिटल्सका पन्तको खेल हेरिसकेपछि क्रिकेटविदहरुले उनी विश्वकपको भारतीय टोलीमा नपरेकोमा प्रश्न उठाएका छन् ।
पन्तले ५ छक्का र २ चौका प्रहार गर्दै २१ बलमा ४९ रन जोड्दै दिल्लीको जितमा महत्वपूर्ण योगदान दिएका थिए । ‘प्लेयर अफ दि म्याच’ बनेका पन्तलाई क्रिकेटविदले ‘गेम चेन्जर’ को संज्ञा दिएका छन् ।
इङ्ल्याण्डका पूर्वकप्तान मिचेल भाउगनले आश्चर्य जनाउँदै ट्विट गरेका छन्, ‘रिषभ पन्त कसरी भारतको विश्वकप टोलीमा परेनन् ? म विश्वस्त छु, किनकि भारतसँग अझै पनि खेलाडी परिवर्तन गर्ने समय छ ।’
सन्जय मान्जेकरले आफू औपचारिक रुपमै ‘रिषभ पन्त फ्यान क्लब’ मा प्रवेश गरेको भन्दै ट्विट गरेका छन् । क्रिकेटवाला ट्विटर एकान्टले पन्तको खेल भारतीय क्रिकेट टोलीका छनौटकर्ताका लागि संकेत भएको लेखेको छ ।
अभिनेता ऋषी कपुरले भारतीय टोलीका कोच रवि शास्त्री र कप्तान विराट कोहलीलाई मेन्सन गर्दै सोधेका छन्, ‘रिषभ पन्त किन विश्वकपको भारतीय टोलीमा परेनन् ?’ विरेन्द्र सहवागले पन्तलाई ‘गेम चेन्जर’ को संज्ञा दिएका छन् ।