२०७५ पौष ११ बुधबार १७:३४:००
नयाँ पत्रिका

राजेन्द्र महतो भन्छन्, ‘टोलटोलमा पुग्नुपर्ने सरकार पोलपोलमा पुगिरहेको छ, यसरी हुन्छ ?’

राजपा अध्यक्ष मण्डलका संयाेजक राजेन्द्र महतोले नेकपा अध्यक्ष प्रचण्डले सरकारले राम्रो गरेको भन्ने विषयमा आपत्ति जनाएका छन् । उनले भने, ‘प्रचण्डजीले बोल्दिनुभो सब ठिकठाक छ भनेर तर, सब ठिकठाक छैन ।’ उनले ‘रेशम चौधरी यो हाउसमा रहनुपर्छ कि पर्दैैन ?’ भनेर आक्रोश पोखेका छन् । 

महतोले भने, ‘जनताबाट निर्वाचित रेशम चौधरी जेलमा बस्नुपर्ने ? यहि हो लोकतन्त्र ? यसैका लागि लडेको हो हामी ? थारुको छोराले आन्दोलन गर्दा जेल बस्नुपर्ने ?’

नेकपा अध्यक्ष प्रचण्डलाई दुई रंगका व्यवहार हुन नसक्ने भन्दै यता सोच्न र मौन भएर नबस्न आग्रह गरे । उनले भने, ‘दुई तिहाइको सरकार खोदा पहाड, निक्ला चुहा । दुई तिहाइमा के हुँदैन ? हामीले पनि आशा गरेको हो तर खै केहि भएन त । आफ्नै हातले आफ्नो पिठ थप्थप्याएर हुँदैन, जनताले राम्रो गरेको छ भन्नुप-यो नि ।’

महतोले निर्मला पन्तको बलात्कारी कहाँ हरायो ? भन्दै सरकारलाई प्रश्न तेर्स्याए । उनले भने, ‘टोलटोलमा पुग्नुपर्ने सरकार पोलपोलमा पुगिरहेको छ, यसरी हुन्छ ?’

उनले जनताले रगत बगाएर आएको नेपालको संविधान जसरी पनि जोगाउनुपर्ने बताए । उनले संविधान जोगाउनका लागि पनि समयसापेक्ष संशोधन गर्नुपर्ने नत्र दुनियाँको कुनैपनि तागतले जोगाउन नसक्ने पनि जिकिर गरे । ‘संविधान संशोधन गर्छु भनेर सरकारमा गएको हाम्रो एकजना पाटनरलाई खोज्दाखोज्दै भेटिएन,’ उनले सरकारमा सहभागी संघीय समाजवादी फाेरमप्रति लक्षित गर्दै भने।

‘मदन भण्डारी लोकमार्गका नाममा चुरेलाई खत्तम पार्दिने ? मधेसलाई मरुभूमि बनाउने ? चुरेलाई नाश गर्ने काम सरकारले गर्नुभएन नि !’ सरकार संघीयतालाई असफल बनाउन लागेको उनको आरोप छ । महतोले भने,‘अरु काम नपाएपछि सरकार एसिया प्यासिफिक समिट गर्न जान्छ । नेपालीलाई होली वाइनले शुद्ध गर्ने रे ! यस्ता धन्दामा सरकार लागेको छ, अनि कहाँ हुन्छ ?’

बाबुरामले प्रचण्डलाई त्रिभुवनसँग तुलना गर्दै भने, ‘चिल्ला गाडीमा कुदेर धुलो धुँवा देखिन भन्ने ?’

अरुले त ठगे, प्रधानमन्त्रीले ठग्न पाइन्छ ? काम गर्नुस् न : सभापति देउवा

पहिलो विश्वयुद्धपछि अमेरिकातर्फ सिफ्ट भएकाे विश्व राजनीतिक व्यवस्था एसियातर्फ सर्दैछ : प्रचण्ड