आफन्त, यात्रा जिन्दगीको, झट्कालगायतका टेलिसिरियलमा प्रमुख भूमिका निर्वाह गरिसकेकी कास्की, लेखनाथकी शान्ति पौडेल कलाकारितालाई नै करिअर बनाउन प्रयासरत छिन् । स्नातक तेस्रो वर्षमा अध्ययनरत उनले केही म्युजिक भिडियोमा समेत अभिनय गरेकी छिन् ।
अभिनयका साथै फिल्म निर्देशनमा पनि रुचि रहेको बताउने शान्तिले ‘सुन्तलीलाई भगाइ लग्यो झिल्केले’, ‘ड्रिम गर्ल’लगायतका केही फिल्ममा सहायक निर्देशकको जिम्मेवारी निर्वाह गरिसकेकी छिन् । विगत सात वर्षदेखि कलाकारितामा क्रियाशील उनी आरबी मुभिजमा नृत्य प्रशिक्षकका रूपमा समेत काम गरेको बताउँछिन् ।
‘धेरै काम गरेर होइन, थोरै तर गुणस्तरीय प्रोडक्टबाट चिनिन चाहन्छु,’ उनी भन्छिन्, ‘अभिनयका साथै भविष्यमा फिल्म निर्देशन गर्ने योजना छ । त्यसैले अहिलेदेखि नै निर्देशनका विविध पक्षसँग भिजिरहेकी छु ।’