अदालतमा सुनुवाइ चलिरहेको थियो । एकाएक विचाराधीन मुद्धाका कैदीले आफ्नो टिसर्ट खोले र न्यायाधीशलाई आफ्नो ढाड देखाए, जहाँ ॐ खोपिएको थियो ।
भारतको नयाँ दिल्लीको तिहाड जेलमा रहेका ती कैदी मुसलमान हुन् । उनले आफ्नो ढाडमा जेल निरिक्षकले जबरजस्ती ॐ खोपिदिएको आरोप लगाएका छन् ।
दिल्लीका महानगरीय न्यायाधीशका सामुन्ने आफ्नो ढाडमा खोपिएको चिह्न देखाउँदै उनले जबरजस्ती तातो फलामले आफूलाई डामिएको बताए । यसबाहेक निरीक्षकले उनलाई नवरात्रिमा खाना खान नदिएको र आफ्नो धर्म परिवर्तन गरिदिने धम्की दिएको उनले बयान दिएका छन् ।
नब्बीर नामका यी कैदी सन् २०१६ मा गिरफ्तार भएका थिए । यसपछि उनी तिहाड जेलमा छन् ।