सत्तारुढ दल नेपाल कम्युनिस्ट पार्टी (नेकपा)का अध्यक्ष एवम् पूर्व प्रधानमन्त्री पुष्पकमल दाहालले कफी क्षेत्रको विकासमा लगानी बढाउन सरकारलाईं आग्रह गरेका छन् । 

अन्तर्राष्ट्रिय बजारमा ठूलो परिणाममा माग भईरहेको कफी खेतीको विकासका लागि कृषकहरुलाई प्रोत्साहित हुनेगरी नीति र कानुन निर्माण गर्न उनले सरकारको ध्यानाकर्षण गराए ।  काठमाडौंमा सोमबार सुरु भएको नेपाल कफी व्यवसाय प्रवद्र्धन सम्मेलन उद्घाटन गर्दै उनले नेपालको व्यापार घाटालाई कम गराउन समेत कफी खेती भरपर्दो माध्यमको रुपमा रहेको र त्यसको विकासमा निजी क्षेत्रले समेत चासो नदिएकोमा उनले असन्तुष्टि जनाए ।

अध्यक्ष दाहालले युवाहरुलाई विदेश पलायन हुनबाट रोक्न पनि नेपालमा कफी खेतीको विकास गर्नुपर्ने जरुरी रहेको बताए । नेपालको ४२ जिल्ला कफी खेतीको दृष्टिले अति महत्वपूर्ण मानिन्छ । तर त्यसको विकासमा सरकार र निजी क्षेत्र दुवैले चासो दिन नसकेको अध्यक्ष दाहालको भनाई छ ।