सरकारी तथा सार्वजनिक जग्गाहरूलाई राजनीतिक दलका नेताहरूको सहयोगमा निजीकरण गरिएको विरोधमा विवेकशील नेपाली दलले सोमबार सिंहदरबार अगाडि विरोध कार्यक्रम गरेको छ ।
कागजात बनाउने अनि त्यसलाई वैधता दिने निर्णय सरकारबाटै हुँदै आएका घटनाहरु पनि सार्वजनिक भइरहेका बेला बिरोध कार्यक्रम गरेको विवेकशील नेपाली दलले जनाएको छ । ‘लुटतन्त्र का अनेक कथा’ नाम दिइएको बिरोध कार्यक्रममा सहभागीहरूले सार्वजनिक जग्गाहरू नै यसरी अतिक्रमण हुँदा लोकतन्त्र लुटतन्त्रमा परिणत भएको बताए । ठुला पार्टीका शिर्ष नेताहरु नै यसरी माफियाको पक्षमा अनि सहयोगमा उभिँदा, नेता र माफिया छुट्याउन गाह्रो भएको सहभागीहरुको धारणा थियो ।
साथै, सार्वजनिक जग्गा अतिक्रमणले संस्कृतिहरूलाई कमजोर बनाउने, बालबालिकाले डुल्ने, खेल्ने ठाउँ नपाउने जस्ता समस्या आएको बिरोधमा सहभागीहरुको भनाई थियो । सहभागीले ‘नेता हौ कि भू माफिया’, ‘माफिया सांसद राजीनामा दे ।’, ‘सिद्धान्तमा कम्युनिस्ट, काममा कमाउनिस्ट ?’ लगायतका नारा समेत लगाएका थिए ।