नेकपा एमालेले संवैधानिक परिषद्सम्बन्धी विधेयक संसदमा प्रधानमन्त्री स्वयंलाई प्रस्तुत गर्न रुलिङ माग गरेको छ ।

आइतबार बसेको प्रतिनिधिसभाको बैठकमा सरकारका तर्फबाट संवैधानिक परिषद्सम्बन्धी विधेयक पेस गर्न सञ्चार तथा सूचना प्रविधिमन्त्री रेखा शर्मा रोस्ट्रममा गएपछि एमाले सांसदहरूले विरोध गर्दै प्रधानमन्त्रीलाई नै विधेयक प्रस्तुत गर्न सभामुख देवराज घिमिरेसँग रुलिङ माग गरेका हुन् ।

नेकपा एमालेका सांसद रघुजी पन्तले संवैधानिक परिषद्सम्बन्धी विधेयक प्रधानमन्त्रीले प्रस्तुत गर्नुपर्ने र प्रधानमन्त्री संसदमा भएको वेलामा अन्य मन्त्रीलाई लगाउनुको औचित्य पुष्टि गर्न माग गरे । प्रधानमन्त्री हुँदाहुँदै अर्को मन्त्रीलाई पेस गर्न दिनु संसद्को गरिमालाई अवहेलना गर्नु रहेको उनको तर्क छ ।

त्यस्तै, एमालेका सांसद योगेश भट्टराईले संवैधानिक परिषद्सम्बन्धी विधेयक प्रधानमन्त्रीले नै पेस गर्नुपर्ने बताए । प्रधानमन्त्री हुँदाहुँदै अर्को मन्त्रीलाई पेस गर्न लगाउनु उचित नहुने उनको भनाइ छ ।