कवि तथा गीतकार वसन्त चौधरीले प्रणय दिवसका अवसरमा काठमाडौंको मण्डला थिएटरमा एकल कविता वाचन गरेका छन् । ‘लभ इज इन दी इयर’को थिम दिइएको कार्यक्रममा चौधरीले आफ्ना प्रिय दर्शक तथा प्रशंसकलाई एक घन्टासम्म कविता, मुक्तक र गजल सुनाए । सबै रचना प्रेम, प्रेमिका र प्रेमिल सम्बन्धसँग सम्बन्धित थिए ।
कवि चौधरीले आफूले कविताका माध्यमबाट एउटा छुट्टै प्रेममय संसारको रचना गर्न चाहेको बताए । ‘आँसु, हाँसो, सुख–दुःखजस्ता भावनात्मक रहरबाट नै कविता जन्मिन्छ । म चाहन्छु, मेरो कविता नदीको शीतल प्रवाहसरी शान्त होस् । पहराबाट छुटेको छहरासरी गतिमय पनि,’ उनले भने ।
उनले हाल रोकिएको आफ्नो विश्व काव्ययात्राको थालनी चाँडै गरिने उद्घोषसमेत गरे । कार्यक्रममा उनका दुईवटा पुस्तक ‘मेरा गीत’ (गीतहरूको संग्रह) तथा ‘जीवनमन्त्र–२’ (सूक्तिसंग्रह)को सामूहिक लोकार्पणसमेत गरिएको थियो ।