पश्चिम नवलपरासीको सुनवल नगरपालिका– ४ अल्कनेडाँडामा शुक्रबार बिहान ट्रकको ठक्करबाट पिकअपचालकको मृत्यु भएको छ । पूर्व–पश्चिम राजमार्गको बुटवल–नारायणगढ सडकखण्डको सुनवल- ४ मा ना.४च ९६३१ नम्बरको पिकअपलाई ना.५ख ९७१५ नम्बरको ट्रकले ठक्कर दिँदा पिकअपचालकको निधन भएको हो ।
जिल्ला प्रहरी कार्यालय पश्चिम नवलपरासीका प्रहरी नायब उपरीक्षक भोजराज पाण्डेयका अनुसार दुर्घटनामा परी पिकअपचालक चितवनको भरतपुर महानगरपालिका– १४ शिवनगरनिवासी ५२ वर्षीय राजकुमार विकको निधन भएको हो । दुर्घटनामा परी गम्भीर घाइते विकको उपचारको क्रममा पृथ्वी चन्द्र अस्पताल परासीमा आज बिहान निधन भएको हो ।
दुर्घटनामा परी टिपरमा सवार भरतपुर महानगरपालिका– २३ बस्ने २५ वर्षका शिव श्रेष्ठ गम्भीर घाइते भएका छन् । उनको देवदह मेडिकल कलेज भलुही रुपन्देहीमा उपचार भइरहेको छ । ट्रक र ट्रकचालक प्रहरी नियन्त्रणमा रहेको प्रहरीले जनाएको छ ।