• वि.सं २०७७ चैत २९ आइतबार
  • वि.सं २०७७ चैत २९ आइतबार
  • Sunday, 11 April, 2021
दुई वर्षअघि आयोजना शिलान्यास गरिँदै । फाइल तस्बिर
२०७७ फाल्गुण २० बिहीबार ०८:३८:००
अर्थ

प्रधानमन्त्रीको सेयर रहेको माथिल्लो ३– बी कछुवाको गतिमा

परीक्षण उत्पादन गरिसक्नुपर्ने समयमा ४६ प्रतिशत मात्र काम सम्पन्न

२०७७ फाल्गुण २० बिहीबार ०८:३८:००

सम्झौताअनुसार काम भएको भए नुवाकोटमा निर्माणाधीन माथिल्लो त्रिशूली ३–बी जलविद्युतबाट अहिले धमाधम परीक्षण उत्पादन भइरहेको हुन्थ्यो । तर, २९ फागुन २०७७ मा निर्माण सम्पन्न गर्नुपर्ने सम्झौता भएको आयोजनाको काम आधा पनि सकिएको छैन । किस्पाङ गाउँपालिकाको पैरेबेँसीमा निर्माणाधीन आयोजना ऊर्जामन्त्री वर्षमान पुनले २७ माघ २०७५ मा शिलान्यास गरेका थिए ।

माथिल्लो त्रिशूली ३ ए जलविद्युतकाे क्यासेट परियोजनाका रूपमा निर्माण हुन लागेको आयोजनाको प्रगति हालसम्म ४६ प्रतिशत मात्र भएको आयोजना प्रमुख मोहनप्रसाद गौतमले जानकारी दिए । ‘नेपालको पानी जनताको लगानी’ भन्ने नारासाथ जनताका लागि लगानी रहेको आयोजनामा प्रधानमन्त्री केपी ओलीको पनि सेयर रहेको छ । जलविद्युतमा जनताको लगानी बढाउन भन्दै प्रधानमन्त्री केपी ओलीको पनि सेयर रहेको आयोजनाको निर्माण कार्य भने कछुवाको गतिमा भइरहेको छ । १० हजार कित्ता सेयरका लागि आवेदन दिएको प्रधानमन्त्रीदम्पतीले आयोजनाको सेयर बाँडफाँड गर्दा २०–२० कित्ता पाएका थिए । 

कोरोनाका कारण गत वर्ष चैतदेखि ठप्प रहेको आयोजनाको काम अझै पनि सुचारु हुन सकेको छैन । चिनियाँ ठेकेदार कम्पनीका कामदार पनि चीनबाट नै आउनुपर्ने भएकाले काम अझै सञ्चालन हुन नसकेको उनको भनाइ छ । ‘कोरोनाका कारण कामदार अझै आएका छैनन् । उनीहरू यही हप्ता आउने क्रममा छन् । खोप लगाइसकेका कारण उनीहरू आएर अब काम सुचारु हुन्छ,’ प्रमुख गौतमले भने । 

चिनियाँ नाका बन्द भएको र आयोजनाका उपकरण पनि चीनमै निर्माण गरी ल्याउनुपर्ने भएकाले पनि आयोजना अघि बढाउन नसकिएको उनको गुनासो छ । उनका अनुसार यसै हप्ता चिनियाँहरू आउने र मार्चको दोस्रो हप्ताबाट काम सुचारु हुनेछ । आयोजनाको म्याद एक वर्ष थप्ने तयारी भइरहेको पनि गौतमले जानकारी दिए । नेपाल विद्युत् प्राधिकरण र नेपाल दूरसञ्चार कम्पनी लिमिटेडको मुख्य लगानीमा निर्माण हुन लागेको ३७ मेगावाटको माथिल्लो त्रिशूली ३– बी जलविद्युत् आयोजना इन्जिनियरिङ, खरिद तथा निर्माण (इपिसी) मोडेलमा भइरहेको छ । 

आयोजनाको प्रवद्र्धक त्रिशूली जलविद्युत् कम्पनी लिमिटेडमा प्राधिकरण र नेपाल टेलिकमको ३०–३० प्रतिशत सेयर छ । कम्पनीमा रसुवा तथा नुवाकोटका स्थानीय पालिकाका बासिन्दाको ५ प्रतिशत, रसुवा तथा नुवाकोटका स्थानीय वित्तीय संस्थाको ५ प्रतिशत, रसुवा तथा नुवाकोटवासीको १० प्रतिशत, सर्वसाधारणको १५ प्रतिशत र प्राधिकरण तथा टेलिकमका कर्मचारीको ५ प्रतिशत सेयर रहेको छ ।