- वि.सं Invalid date format
रास्वपा सांसद सोबिता गौतमले गैरआवासीय नेपालीलाई भिसा दिने प्रावधान आपत्तिजनक रहेको बताएकी छिन्।
प्रतिनिधिसभाको सोमबार बसेको बैठकमा सुशासन प्रवर्द्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने बनेको प्रतिस्थापन विधेयकमाथिको दफावार छलफलमा भाग लिँदै सांसद गौतमले बाध्यता र अन्य कारणले बाहिर रहेका तथा आफ्नो जीवन चलाउने क्रममा गैरआवासीय भएका नेपालीलाई १० वर्ष फ्रि-भिसा दिने व्यवस्था कुनै बहादुरीको काम नभएको बताइन्।
गैरआवासीय नेपालीको नाता देशसँग टुट्दा घाटा नेपाललाई नै हुनेतर्फ सरकारको ध्यानाकर्षण गराइन्। ‘रेमिट्यान्स र लगानीका क्षेत्रमा नेपालीको ठुलो हात छ। अर्को नेपालभन्दा बाहिरका नेपाली समुदायमा धेरै राजनीति भएको सुनिन्छ। अनि नेताहरू गैरआवासीय नेपालीहरुलाई फकाउन गएको पनि सुनिन्छ। देशमा राजनीति गर्न उहाँहरूलाई फकाउन जाने, अनि उहाँहरुलाई भिसा दिने कुराले झन् धेरै चिढ्याउँछ होला। त्यसकारण यसले कसैलाई फाइदा गर्दैन। उहाँहरुलाई देशसँगै जोड्नुपर्छ। देश राम्रो हुँदा फर्किने वातावरण हुन्छ। त्यसैले दूरी नबनाऊँ।’
त्यसैले भिसा निःशुल्क होइन् भिसा नै नचाहिने प्रावधान राख्न उनले सरकारको ध्यानाकर्षण गराइन्। ‘जोसँग एनआरएन नागरिकता छ, उहाँहरूलाई भिसा नै नहुने प्रावधान आवश्यक छ,’ उनले भनिन्।
सरकारले विधेयकमा ‘नेपालमा बसोबास गर्ने गैरआवासीय नेपाली नागरिकता प्राप्त व्यक्ति वा परिचयपत्र प्राप्त नेपाली मूलको विदेशी नागरिक वा निजको परिवारलाई दश वर्षसम्मको गैरआवासीय नेपाली भिसा निःशुल्क उपलब्ध गराइने’ भनेको छ।
सांसद गौतमले यसमा ‘नेपालमा बसोबास गर्ने गैरआवासीय नेपाली नागरिकता प्राप्त व्यक्ति वा परिचयपत्र प्राप्त नेपाली मूलको विदेशी नागरिकलाई नेपाल प्रवेश गर्न भिसाको आवश्यकता पर्ने छैन,’ भनेर संशोधन राखेकी छिन्।
